Ættleiddir hjólbarðar

Það er undarleg framsetning að tala um íslensk dekk þegar sagt er berum orðum í fréttinni að þau séu framleidd í Evrópu. Ofan í kaupið geri ráð fyrir því að sérfræðingateymið frá Nokien í Finnlandi hafi hannað þau, en ekki sá hluti fjárfestanna sem er íslenskur. Loks er öruggt að engin íslensk hráefni eru notuð við framleiðsluna.

Hvað er þá nákvæmlega íslenskt við þessi dekk?

Nei, það er ekki nóg að fyrirtækið hafi höfuðstöðvar á Íslandi - hvað sem það nú þýðir. Og það dugar ekki heldur að fyrirtækið heiti Iceland Tyres. Dekkin verða ekki íslensk við það í neinum skilningi!

Þetta lítur út fyrir að vera dæmigert markaðsbull til heimabrúks. Eftir því sem ég kemst næst mundi þessi uppsláttur varða við lög í Bandaríkjunum sem taka merkingar á upprunalandi vöru alvarlega.

Þau eru líklega ættleidd, adopted by Iceland!

Íslensk dekk á götur í haust

Athugasemdir

[jon (IP-tala skráð) 1.6.2015 kl. 10:55]

Hann virðist hafa skrifað þetta viðtal sjálfur. Hvaða blaðamaður myndi ganga frá viðtali sem þessu án þess að athuga hve mikið stofnfé hefði verið sett í dæmið og síðan hve mikill partur af hlutafé væri íslenskt. Og síðan er það frábært hvernig spurningunni um hvernig hugmyndin kviknaði, er ekki svarað. Blaðamaður hefði átt að biðja viðmælanda sinn að svara spurningunni takk.

..Já ég var beðinn að vinna með Nokian (vinna að hverju þá?) (frumkvæðið kom semsagt frá Nokian eða?) ...og við fórum að tala um hvað það yrði rosalega flókið að gera hátækni dekkjaverksmiðju, hugsanlega á Íslandi...(nú já, bíddu hvernig tengist það upphaflegu verkbeiðninni?)...en allavega þegar við vorum að tala um þetta, þá fórum við bara að tala um þessa hugmynd...(hvaða hugmynd?, íslensk vetrardekk semsagt?) 

-Greinarhöfundur gleymdi eiginlega að spyrja hvað væri íslenskt við dekkin. 

[Ólafur Eiríksson, 1.6.2015 kl. 12:27]

Góðir punktar Jón. Vonandi tekur blaðamaður þetta til greina í framtíðinni.

Ég leit á heimasíðu fyrirtækisins og þar er lítið að sjá. http://icelandtyres.com/

Ég fletti upp hver er skráður fyrir léninu og það er svokallað "domain by proxy" hjá lénasalanum Godaddy.com

Þ.e.a.s eigandi lénsins vill ekki láta nafn síns getið.

Skrítið m.v að hér er á ferðinni íslenskt stórfyrirtæki!

[jon (IP-tala skráð) 1.6.2015 kl. 13:35]

...Íslendingar geta keypt íslensk dekk í haust Svona staðhæfingar eru algengar hjá viðmælendum af þessu sauðahúsi og eru til þess fallnar að láta okkur halda að við séum að velja íslenskt og styrkja innviði íslensks hagkerfis og allt það. En hve mikill partur af söluhagnaði rennur til erlendra og innlendra fjárfesta? Fara 15% inn í hagkerfið? 40%? kannski bara 5%?

Við vitum ekkert. Þessi grein skilur bara eftir spurningar.

[Axel Jóhann Hallgrímsson, 1.6.2015 kl. 20:03]

Þetta er svipað og íslendingur fjárfesti í sauðfjárbúskap á Nýja-Sjálandi. Samkvæmt þessu yrði það kjöt hann framleiddi markaðsett sem íslenskt!